Դեմենցիայի բուժման համար նշանակվող որոշ դեղամիջոցներ կողմնակի լուրջ բարդություններ են  առաջացնում

Բրիտանական բժշկական ամսագրում (BMJ) հրապարակված նոր ուսումնասիրության համաձայն, որոշ հակափսիխոտիկ  դեղամիջոցներ, որոնք նշանակվում են դեմենցիայով հիվանդների բուժման համար, կապված են լուրջ կողմնակի ազդեցությունների հետ, ներառյալ սրտի անբավարարությունը:

«Դեմենցիայով տառապող մարդկանց մոտ հակափսիխոտիկ դեղամիջոցների օգտագործումը կապված է մի շարք լուրջ կողմնակի ազդեցությունների հետ, ներառյալ՝ ինսուլտը, թրոմբի առաջացումը, սրտի կաթվածը, սրտի անբավարարությունը, կոտրվածքները, թոքաբորբը և երիկամների սուր ախտահարումը», - ասվում է հետազոտության մեջ:

Հետազոտողները պարզել են, որ վտանգն առավել մեծ է բուժման վաղ շրջանում, ինչը «ընդգծում է  բուժման վաղ փուլերում զգուշավորության մեծացման անհրաժեշտությունը»:

Նեյրոլեպտիկները, ինչպիսիք են ռիսպերիդոնը, քվետիապինը, հալոպերիդոլը և օլանզապինը,   սովորաբար նշանակվում են այնպիսի փսիխոտիկ խանգարումներ ունեցող հիվանդներին, ինչպիսին  շիզոֆրենիան է:

Դրանք նաև օգտագործվում են դեպրեսիան բուժելու համար, որը հատկապես դիմացկուն է այլ դեղամիջոցների նկատմամբ, ինչպես նաև թուլամտությամբ, ինչպիսին Ալցհեյմերի հիվանդությունն է,  տառապող հիվանդների բուժման համար:

Նեյրոլեպտիկ դեղամիջոցները չեն բուժում այս հիվանդությունները, այլ նախատեսված են որոշակի ախտանիշների, օրինակ՝ ագրեսիվ վարքի, վերացման համար:

Բուժման այս մեթոդները բուռն վեճեր են առաջացնում կողմնակի լուրջ ազդեցությունների հարուցման  և դրանց սահմանափակ արդյունավետության պատճառով:

Ֆրանսիայում, ինչպեսև Մեծ Բրիտանիայում, որտեղ անցկացվել է BMJ-ի հետազոտությունը, միայն ռիսպերիդոնը և հալոպերիդոլն են թույլատրված դեմենցիայի ախտանիշները բուժելու համար:

Հետևեք NEWS.am Medicine-ին Facebook-ում և Twitter-ում